Hadrê meydanan!*

“Êdî beso, ma perwerdeyo bi ziwandê xo ya wazenê” TZPKurdî (Tevgera ziwan û perwerdeyê kurdkî) bi gamandê newan a qerardareya xo ya qandê girotişdê mafdê (heqê) ziwandê kurdkî (kirdasî û dimilî) misna dost û dişmenî. TZPKurdî, qerarê ki konferansdê xo yê 4-6ê tîrmehê di day bî, ana ca. Do mabênê 10 îloni û 1ê oktoberi (ekîm) de serranserê Vakurê Kurdistani di rayşîyayîşî, mitîngî û kuçan ser o dersê kurdî bêrê dayiş. Ez destekkerdişê nê serewerzanayîşê seba ziwandê ma wezîfeyêdo kurdbiyayeni vînena. Cora kesê ki xo kurd vînenê û kesê ki xo demokrat zanê gerek (ganî) paştî bidê na kampanya. Ganî bivijîyê meydanan û nê waştekê xo bi jew (yew) venga biqîrê.

Çiyo ki vernîroj di kurdmendişê ma garantî bikero ziwanê ma yo. Kilîtê kultur û nasnameyê ma zî ziwanê ma yo. Rejîmo kemalîst zî na jewi (yew) zano. Cora, no nezdîyê 90 seran o ki ziwanê ma qedexe kerdo. Nameyê dewandê ma virna yo, nêverdano ma bi ziwandê xo ya naman qeçandê xo ya nê. Hetta tehamûlê ci çini yo ki ma nameyêdê cadeyêdê xo bikerê “Berfîn”. No rejîm çi rê wina keno? Qandê ki bi werterawerzanayişdê ziwandê ma ya kokê ma biqlano, ma wertera werzano.

Kiştê ra nê rejîmê kemalîstî zilmêdo gird ziwandê ma ser o kerd, ziwanê ma werdî vist; kişta bîni ra ma kurdan zî qedir û qîmet nêda ziwandê xo. Ma mihîmeya ziwandê xo û tesîrê ziwanî yo ki kurdbiyayişî ser o esto fam nêkerd. Ma ziwanê xo îhmal kerd. Ma ra xeylê kesan bi qeçandê xo ya bi kurdkî (kirdasî ya zî dimilî) qisey nêkerd û hewna zî nêkenê.

Labirê nê serandê peyênan di ma hewna vêşerî ageyrar ziwandê xo ser. Emser Gever di miitîngêdo gird virazîya. Newroza emserî bi kurdkî bî, TZPKurdî 2 konferansî viraştî. Xo hewna vêşêrî organîze kerd. Kişta siyasîya zî qerare zaf bi maney ameygirotiş. Komîteyê kultur û ziwanî yê KCK qerar girot ke ganî tevgerê (hereket) azadî ê kurdan di organîzasyonanê xo pêrini di kurdkî qisey bikerê. Qandê (seba) ki kurdkî vinî nêbo û ravey (aver) şiro, gerek çi tedbîrî lazimî bê, qandê vernîroja ziwandê ma bêrê girotiş. KCK bi awayêdo eşkere baştî dê xebata TZPKurdî.

TZPKurdî zî nê meylî pêro hesab kerdî û xo organîze kerd. Ez di konferansdê Amedî yê 4-6ê tîrmehê di biya. Delegeyî û îdarekerdoxê TZPKurdî zaf bi heyecanî bî. Konferansî dima min Azadiya Welatî di konferansî û TZPKurdî ser o çend nuşteyî nuştî. Ze ki mi di ê nuştan di zî ard ziwan, xebata TZPKurdî û konferansdê Amedî zaf heyecan da mi. Hêvîyê (omid) mi bî girdî.

Nika ma pêro pawedê 20 rojandê çalakîyanê qandê ziwandê xo yê. Şîarê nê serewerzanayişê “Êdî bos o, ma perwerdeyo bi ziwandê xo ya wazenê” yo. Çi şîyarêdo weş!

Nê 20 rojî, rojê tarîxî yê. Di tarîxdê ma kurdan di çalakîyê winasînî yê qandê ziwandê ma hewna nêviraziyayê. Na fina (rey) verêna ki do bi 100-hezarana kurdî bi jew (yew) venga vajê: “Êdî bos o, ma perwerdeyo bi ziwandê xo ya wazenê”. Ma na mesela di tayn berey (erey) mendê, labirê çiyê nêbeno, ki ma qeyret bikerê, ma do bi na kampanyaya mezgê generalan û dewleti biçelqinê. Ez zaf pa bawer kena, ki kurdî çorşmedê (dormedê) na kampanya di arêbê pê ser, do raya çareserkerdişê persda kurdkî akerê. Na kampanya şena bibo kilîtê akerdişdê kêberdê persda Kurdistanî. Coka ez zaf qîmet dana na kampanya.

Ganî na kampanya cayê ki bi dimilî (zazakî, kirmanckî, kirdkî) qisey beno, bi na lehçaya viraziyê. Cayê ki wirna (herdî) lehçey qisey benê bi wirnan a viraziyo. Çiki na kampanya, kampanyaya ziwandê kurdkî ya û ziwanê kurdkî zî Vakur di bi di lehçana a yeno qisekerdeni. Ganî kirdasî zî û zazay zî xo na kampanya miyan di bivînê. Cora bol mihîm o ki kes na kampanya di wirna lehçan bi kar biyaro.

Rojê çalakîyan, rojê ki dibistanî (mektebî) akerde yê. No qerarêdo zaf bi îsabet o. Ez hêvî kena ki di nê rojan di kurdî qeçanê xo nêrişê dibistanandê dewleti. No xisûs di qerarê TZPKurdî çinêbo zî, gerek kes pratîk di mekteban boykot bikero. Yani kamcî sûki di çalakî benê se gerek kes a roji a sûki di mekteban zî boykot bikero ki tesîrê kampanya vêşî bo.Xo ra nikara şarî miyan di meylê winasînî estê.

Ez zaf meraq kena, kurdê ki na kampanya miyan nêkewê û destek nêdê na kampanya do xo rê çi hacet bivînê. Ez hêvî kena ki kes xo a ta û na ta nêkero û na kampanya destek bikero. Çiki no ziwan, ê ma pêrini yo. Kesê ki biwazê ze kurd bimanê, gerek ziwandê xo rê wahêr bivijîyê. Zewbî rayna çinîya. Helbet wahêrvijîyayişî rê zî organîzebiyayîş lazim o. TZPkurdî na mesela di organîzasyonêda zaf hera (hîra) çalak, dinamîk, wahêrê program û pîlan û kadroyanê erciyayan a.

Ez na kampanya zerrî ra destek kena. Ez wazena kurdê ki xo ze kurd vînenê, çi kurdasî (kurmancî) çi dimilî (zaza, kirmanc, kird) na kampanya destek bikerê. Hadrê meydanan! Êdî beso, ma perwerdeyo bi ziwandê xo ya wazenê!”

Haydar Diljen

Wêne: DÎHA

* No nuşte Azadiya Welat û keyepela TZPKurdî de ame neşirkerdiş.